aptitude မိတ်​ဆက်

ကျနော် ဦး​ဘွန်​တု​ကို စ​သုံး​ကတည်းက ရီ​ပို​ဆာ​ဗာ​ထဲ​မှ ဆော့ဖ်​ဝဲ​များ သွင်း​ဖို့ ကွန်​မန်း​လိုင်း​က​ဆို​ရင် “apt-get”, ဂျီ​ယူ​အိုင်​ဆို​ရင်​တော့ “synaptic” ကို​ပဲ စွဲ​စွဲမြဲ​မြဲ သုံး​ခဲ့​ပါ​တယ်။ ရီ​ပို​ထဲ​က မဟုတ်​ပဲ တစ်​ခြား​က ကူး​ဆွဲထား​တဲ့ deb ပက်​ကေ့​တွေ သွင်း​ချင်​ရင်​တော့ ကွန်​မန်း​လိုင်း​က​ဆို​ရင် “dpkg”, ဂျီ​ယူ​အိုင်​က​ဆို​ရင် “gdebi” ကို သုံး​ပါ​တယ်။ ဦး​ဘွန်​တု ဆော့ဖ်​ဝဲ​စင်​တာ​ကို​တော့ အရမ်း​နှေး​တာ​က​တစ်​ကြောင်း၊ အချက်အလက်​တွေ စုံ​စုံလင်​လင် မ​မြင်​ရ​တာ​တစ်​ကြောင်း လုံး​ဝ မ​သုံး​ဖြစ်​ပါ။

ခုနောက်ပိုင်းမှာ ဆာ​ဗာ​တွေ​ကို sshနဲ့ ဝင်​ပြီး စီမံ​ထိန်းသိမ်း​လာ​ရ​တဲ့​အခါ ကွန်​ဆိုး(console) က​ဖြစ်​တဲ့​အတွက် ဆော့ဖ်​ဝဲ​တွေ သွင်း, ထုတ်​လုပ်​ဖို့ အရင်​က​လို “synaptic” ကို သုံး​လို့ မ​ရ​တော့​ပါ။ “apt-get” က ကိုယ့်​သွင်း​မယ့် ပက်​ကေ့​နာမည်​တွေ သိ​ရင် သွင်း​ရ လွယ်​ပေ​မဲ့ နာမည်​အတိ​အကျ မ​သိ​တဲ့ ပက်​ကေ့​တွေ အများ​ကြီး တစ်​ခု​ချင်း ရှာ​လိုက်, သွင်း​လိုက်​လုပ်​ရ​တော့​မယ်​ဆို​ရင် မ​သက်သာ​ပါ။

ဒါ​ကြောင့် အရင်​က စမ်း​ဖူး​ပေ​မဲ့ သေချာ မ​သုံး​ဖြစ်​ခဲ့​တဲ့ “aptitude” ကို ပြန်​သုံး​ဖြစ်​ပါ​တယ်။ သုံး​ရင်း​နဲ့ နည်း​နည်း အသား​ကျ​သွား​တော့ ဂျီ​ယူ​အိုင်​မှာ​တောင် “synaptic” ကို ပြန်​မ​သုံး​ချင်​တော့​ပါ။ “aptitude” ရဲ့ အဓိက အား​သာ​ချက်​တွေ​ကတော့-

• ကွန်​မန်း​လိုင်း အခြေ​ခံ ယူ​အိုင်​ဖြစ်​တဲ့​အတွက် ဂျီ​ယူ​အိုင်​က မဟုတ်​လည်း သုံး​လို့​ရ​ပါ​တယ်။ အပေါ်​မှာ ပြော​ခဲ့​သ​လို ဆာ​ဗာ​ကို “ssh” နဲ့ ဝင်​သုံး​နေ​တဲ့​အခါ​မျိုး, “synaptic” ကို သုံး​မ​ရ​တဲ့​အခါ​မှာ အတော်​အသုံးဝင်​ပါ​တယ်။
• ယူ​အိုင်​က ဂီး(geek)တွေ အကြိုက် ဖြစ်​ပါ​တယ်။ ကျနော်​တော့ သူ့​ယူ​အိုင်​က “synaptic”, “software-center” တို့​ထက် ပို​ပြီး သုံး​ရ ချော​ချောမွေ့​မွေ့ ရှိ​တယ်​လို့ ဂီး​ဆန်​တယ်​လို့ ခံစား​မိ​ပါ​တယ်။ :D
• “synaptic” မှာ ဆော့ဖ်​ဝဲ​တွေ အများ​ကြီး မှတ်ထား​ပြီး သွင်း​နေ​တုန်း အကြောင်း​တစ်​ခု⁠ခု​ကြောင့် ရပ်​ပြီး ပိတ်​လိုက်​ရ​တာ​မျိုး ဖြစ်​ဖူး​မှာ​ပါ။ “synaptic” မှာ ပိတ်​ပြီး ပြန်​စ​ရင် သွင်း,ထုတ်​ဖို့ မှတ်ထား​တဲ့ ပက်​ကေ့​တွေ အကုန် ပြန်​မှတ်​ရ​ပါ​လိမ့်​မယ်။ “aptitude” ကတော့ ကိုယ် သွင်း/ထုတ်​ဖို့ မှတ်ထား​တဲ့ ပက်​ကေ့​တွေ​ကို ကရှ်(cache) ထဲ​မှာ သိမ်းထား​တာ​မို့ ပိတ်​ပြီး ပြန်ဖွင့်​လည်း မှတ်ထား​တာ​တွေ မ​ပျက်​သွား​ပါ​ဘူး။
  
  ကဲ... အသုံးပြု​ပုံ အခြေ​ခံ​ကို နည်း​နည်း လေ့​လာ​ကြည့်​ကြ​ရအောင်…

ဒါ​က စ​ဝင်⁠ဝင်​ချင်း မြင်​ရ​မယ့် မြင်​ကွင်း​ပါ။ အပေါ်, အောက်​သွား​ချင်​ရင် မြှား​ခ​လုပ်​တွေ​အပြင် vim, gmail တို့​က အတိုင်း j, k ကို သုံး​ပြီး သွား​နိုင်​ပါ​တယ်။ အပေါ်​ဆုံး, အောက်​ဆုံး​ကို​တော့ <Ctrl>+a, <Ctrl>+e အသီး​သီး သုံး​ပြီး သွား​နိုင်​ပါ​တယ်။ စာ​မျက်နှာ​အလိုက် အပေါ်, အောက် လှိမ့်​ဆင်း​တက်​လုပ်​ချင်​ရင် <Ctrl>+f, <Ctrl>b ကို သုံး​နိုင်​ပါ​တယ်။

ဝင်⁠ဝင်​ချင်း​မှာ သွင်း​ပြီး​သား, မ​သွင်း​ရ​သေး​တဲ့, အပ်​ဒိတ်​လုပ်​လို့​ရ​နိုင်​တဲ့ စ​သ​ဖြင့် ပက်​ကေ့​တွေ​ကို အုပ်စု​ခွဲ​ပြီး ပြ​ပေး​ထား​ပါ​တယ်။ အဲ​ဒီ​အုပ်စု​တွေ​ကို ဖြန့်​ချ​ချင်​ရင် [ ကို သုံး​ပါ။ ပြန်​လိပ်​ထား​ချင်​ရင် ] ကို သုံး​ပါ။

ပက်​ကေ့​ကို အသေး​စိတ် ကြည့်​ချင်​ရင် Enter နှိပ်​ပါ။ နောက်ပြန်​သွား​ချင်​ရင် q သုံး​ပါ။

ကိုယ်​သွင်း​ချင်​တဲ့ ပက်​ကေ့​ကို နာမည်​နဲ့ ရှာ​ချင်​ရင် / ကို သုံး​ပါ။ ရှာ​လိုက်​လို့ ရ​လာ​တဲ့ ပက်​ကေ့​တွေ​ကို သူ​က “synaptic” လို သီး​သန့်​ခွဲ မ​ပြ​ပေး​ပါ။ တစ်​ခု​ချင်း အရှေ့, နောက် n, N ကို သုံး​ပြီး ကြည့်​ရ​ပါ​တယ်။

ကိုယ်​ရှာ​တဲ့ ပက်​ကေ့​ကို တွေ့​ရင် သွင်း​ဖို့​ဆို​ရင် +, ထုတ်​ဖို့​ဆို​ရင် - ကို သုံး​ပြီး မှတ်​နိုင်​ပါ​တယ်။ သွင်း​ချင်, ထုတ်​ချင်​တာ​တွေ အကုန် မှတ်​ပြီး​ရင် g ကို​နှိပ်​ပြီး သွင်း, ထုတ်​နိုင်​ပါ​တယ်။

အပ်​ဒိတ်​လုပ်​ဖို့, မှတ်ထား​တာ​တွေ မေ့​ပစ်​ဖို့ အစ​ရှိ​တဲ့ အခြား​ဖန်​ရှင်​တွေ​ကို သုံး​ချင်​ရင်​တော့ <Ctrl>+t ကို​နှိပ် မီ​နူး​ကို ခေါ်​သုံး​နိုင်​ပါ​တယ်။

မီ​နူး​မှာ မြင်​ရ​တဲ့​အတိုင်း “aptitude” က ထွက်​တော့​မယ်​ဆို​ရင်​တော့ q နှိပ် ထွက်​နိုင်​ပါ​တယ်။ “aptitude” အသုံးပြု​ပုံ​နဲ့ ပတ်သက်​ပြီး ပြော​ချင်​တာ​ကတော့ ဒီ​လောက်​ပါ​ပဲ။ ပို​ပြီး အသေး​စိတ် သိ​ချင်​ရင်​တော့ ? နှိပ်​ပြီး အသုံးပြု​ပုံ အသေး​စိတ်​ကို ကြည့်​နိုင်​ပါ​တယ်။

“aptitude” က ကွန်​မန်း​လိုင်း အက်​ပလီ​ကေး​ရှင်း​ပီပီ စ​သုံး​ကာ​စ​မှာ သုံး​ရ​ခက်, သင်​ရ​ခက်​ပေ​မဲ့ လင်း​နက်စ်​ဆာ​ဗာ​များ​ကို စီမံ​ထိန်းသိမ်း​နေ​ရ​တဲ့​သူ​များ, လင်း​နက်စ်​ဂီး​လောင်း​များ လေ့​လာ​ထား​သင့်​တဲ့ အက်​ပလီ​ကေး​ရှင်း​တစ်​ခု​ဖြစ်​ကြောင်း ပြော​ကြား​ရင်း ဒီ​ပိုစ့်​လေး​ကို ဒီ​မှာ​ပဲ ရပ်နား​ခွင့်​ပြု​ပါ​ခင်ဗျာ။